Грэка-каталіцкі святар: Нястомна молімся за Богам сцеражоную нашу Беларусь і ўвесь народ

0
16

Грэка-каталіцкі святар: Нястомна молімся за Богам сцеражоную нашу Беларусь і ўвесь народ0

Слова Апостальскага Візітатара для грэка-католікаў Беларусі на свята Пасхі Хрыстовай 2021 года.

Слова Апостальскага Візітатара архімандрыта Сяргея для грэка-католікаў Беларусі на свята Пасхі Хрыстовай 2021 года апублікаваў catholic.by:

— Пачэсныя Святары і Дыяканы! Дарагія Манахі, Манахіні і Браты Семінарысты!

Любыя ў Госпадзе Браты і Сёстры! Паважаныя Сябры!

Шчыра віншую ўсіх вас са Светлым Уваскрасеннем Хрыста:

Хрыстос уваскрос! – Сапраўды ўваскрос!

1. Гэтыя словы гучаць на Беларускіх Землях больш за тысячу гадоў. Гэтым радасным воклікам нашыя продкі сведчылі сваю веру ў тое, што Уваскрослы Хрыстос сапраўды жыве сярод іх, што Ён з’яўляецца крыніцай новага жыцця. Гэтая радасная звестка праз стагоддзі абдымала і яднала на землях Беларусі хрысціянаў розных царкоўных традыцый – усходняй і заходняй.

2. Узгадайма, што 1035 год таму – у 986 годзе місіянер Торвальд (Кодрансан) з далёкай Ісландыі – праз Ерусалім і Канстанцінопаль – прыбывае з таварышам у Полацк. Прыбывае з граматай візантыйскага імператара Васілія ІІ і з блаславеннем патрыярха Канстанцінапольскага Мікалая II (Хрысаверга). Да Полацка – сэрца Беларускіх Земляў Евангелле Ісуса Хрыста прыходзіць з Захаду і Усходу, у час еднасці Цэркваў. У духу братэрскай еднасці нараджалася беларускае хрысціянства і аб гэтай каштоўнай спадчыне хрысціянскай еднасці трэба нам памятаць і сёння. Памятаць, што ў Беларусі мы – хрысціяне розных канфесій – пакліканыя разам “вызнаваць Таго, хто нас асвяціў”.

ЧИТАТЬ ТАКЖЕ:  Алесь Бяляцкі: Супраць народу ўлады разьвязалі сапраўдны тэрор

3. Выдатны прапаведнік нашых земляў, св. Кірыл Тураўскі пісаў:

“Верма Хрысту, Богу нашаму. Паклонімся Укрыжаванаму, праславім Уваскрослага. Пахвалім Таго, хто прыйшоў нас ажывіць. Вызнавайма Таго, хто нас асвяціў. Узвялічым Таго, хто даў нам безліч усялякіх дабротаў” (Слова на Нядзелю Тамаша).

Да гэтых дабротаў духовых і культурных належыць нашая Бацькаўчына – Беларусь і мужны беларускі народ, нашая беларуская мова і культура прасветленая святлом Уваскрослага Хрыста.

4. У гэтыя дні хрысціянская супольнасць Беларусі жыве ў двайным святле Таямніцы Крыжа і Уваскрасення Госпада і Збаўцы нашага Ісуса Хрыста. Вернікі Праваслаўнай Царквы святкуюць Нядзелю Крыжапаклонную, хрысціяне заходняй традыцыі – Нядзелю Уваскрасення Хрыстовага. Крыж і Уваскрасенне – крыніцы нашай хрысціянскай мужнасці, што дазваляе нам быць вернымі Евангеллю Ісуса Хрыста ў кожны час, у кожнай сітуацыі.

Таму нястомна молімся “за Богам сцеражоную краіну нашу Беларусь і ўвесь беларускі народ, за стойкасць у веры, мужнасць у выпрабаваннях і вернасць свайму народу ўсіх нас” (Мірная ектання).

Карыстаемся старажытным тэкстам візантыйскай Літургіі св. Яна Залатавуснага і молімся:

ЧИТАТЬ ТАКЖЕ:  В Минске задержали мужчину с подтвержденным коронавирусом и отправили на Окрестина

— за хворых, тых што церпяць, зняволеных,

— за тых, што робяць дабро, памятаюць пра ўбогіх.

Гэтыя малітвы вучаць нас духовай салідарнасці і братэрскай дапамогі – у моцы Крыжа Хрыста ды ў святле Ягонага Уваскрасення.

5. У свята Уваскрасення Гасподняга хочам сардэчна прывітаць са святам Пасхі ўсіх, хто яе святкуе паводле новага календара: грэка-католікаў, братоў рыма-католікаў, братоў пратэстантаў.

Братам праваслаўным, якія будуць святкаваць Пасху паводле юліянскага календара, жадаем добрага вялікапоснага духовага подзьвігу.

Усім жадаем багатых дароў міру, радасці, жывой веры, моцнай надзеі ды мужнай любові ад Уваскрослага Хрыста — Чалавекалюбца і вітаем святочным вітаннем:

Хрыстос уваскрос! – Сапраўды ўваскрос!

Мінск, Пасха Гасподняя 2021 года.

Архімандрыт Сяргей Гаек

Апостальскі Візітатар для грэка-католікаў Беларусі

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь